PASAPORTE LECTOR 3º TRIMESTRE

 Rematamos o trimestre facendo entrega dos premios do pasaporte lector a aqueles nenos/as que conseguiron os tres selos. 

Noraboa a todos e todas (faltan moitos nenos/as na foto). E a seguir lendo con tanto entusiasmo para o próximo curso!

BIBLIOPATIO

 Aproveitamos o bo tempo para poñer en funcionamento a "bibliopatio".

PRESENTACIÓN OCEANÍA

Hoxe tocounos presentarlles aos nosos compañeiros e compañeiras todo o que investigamos de Oceanía: animais, comidas típicas, lugares de interese...

Deixamos unhas imaxes que reflexan todo o traballo feito. 

CONCURSO DE BANDEIRAS.

O venres levamos a cabo un concurso de bandeiras onde o alumnado que se animou a participar debía ser o primeiro en identificar a bandeira e dicir a que país pertencía. 

Foi un recreo moi emocionante onde pasamos un ratiño moi divertido. 

Noraboa aos participantes por ser capaces de recoñecer tantas bandeiras. Sodes incribles!!!

CHARLA CON ANA LOJO.

Hoxe o alumnado de 6º de Ed. Primaria tivo a sorte de charlar con Ana Lojo (escritora e mestra do noso centro). Despois de ler o seu libro Estela de Cartas, tiveron a ocasión de falar con ela sobre o proceso de creación dun libro, desde os primeiros esbozos ata a súa publicación. 

Tamén aproveitaron a ocasión para facerlle preguntas e para levar un exemplar asinado. E tiveron a primicia de saber como empezará a segunda parte deste libro...

Grazas Ana, por adicarnos un cachiño do teu tempo!

LETRAS GALEGAS COA CRUZ VERMELLA

O venres 16 celebramos a tradicional Romaría das Letras Galegas adicada este ano á poesía tradicional oral (cantareiras). 

Por iso, dende a biblioteca, invitamos ao grupo de cantoterapia da Cruz Vermella a desfrutar deste día con nós para que nos deleitaran con algunhas cantigas tradicionais. Foi unha xornada chea de música e baile onde toda a comunidade escolar festexou a nosa lingua.

Moitas grazas á Cruz Vermella por colaborar, unha vez máis, co noso cole!

CADA LIBRO CO SEU PAÍS.

Para relacionar o día do libro co proxecto de centro deste curso, decidimos investigar de que país eran diferentes contos. Unha vez feita a investigación, ilustramos a súa portada e fixemos a bandeira do país correspondente. 

Aquí podedes ver algún exemplo.